Kryeministri Edi Rama prezantoi të hënën në Tiranë marrëveshjen mes Qendrës Spitalore Universitare “Nënë Tereza”, Universitetit të Mjekësisë dhe Qendrës Spitalore Universitare të Ekselencës Europiane “San Raffaele”, si dhe Universitetit përkatës “Vita-Salute San Raffaele”.

Kjo marrëveshje synon të krijojë një partneritet strategjik për të integruar eksperiencën dhe praktikat më të mira të këtyre institucioneve, duke ofruar një nivel europian kujdesi dhe edukimi mjekësor.

Në fjalën e tij, kryeministri Rama theksoi se QSUT, me zbatimin e kësaj marrëveshjeje, pritet të bëhet një qendër ekselente shëndetësore dhe mjekësore për gjithë Ballkanin.

“Ambicia jonë është që QSUT të bëhet qendra spitalore e referencës për të gjithë Ballkanin dhe ta kthejmë atë në një qendër ekselence mes të gjitha qendrave të ekselencës në Europë. Duam ta transformojmë Universitetin e Mjekësisë dhe të theksoj se në këto dy bashkëpunime, që janë pjesë e të njëjtës marrëveshje, synimi nuk është të kemi një partner më shumë, por shumë partnerë që kemi, dhe konsulentë të rinj”, tha Rama.

Rama shpjegoi gjithashtu rolin konkret të “San Raffaele” në QSUT, ku do të ketë një përfshirje të drejtpërdrejtë në menaxhimin e QSUT-së dhe organizimin e punës, si dhe bashkimin e profesionistëve të mjekësisë.

“Synimi është që deri në vitin 2030, nga njëra anë, Qendra Spitalore Universitare të kalojë transformimin që ‘San Raffaele’ ka sjellë në Poloni, duke u përfshirë drejtpërdrejt në menaxhimin e saj dhe organizimin e jetës së përditshme të saj. Do të bashkojmë profesionistët nga të dy anët, të San Raffaele dhe QSUT, duke krijuar një mundësi të vërtetë dhe të qëndrueshme për shëndetësinë publike shqiptare”, tha kryeministri.

“Universiteti i Mjekësisë në Tiranë do të synojë të ofrojë të njëjtën diplomë që merret në ‘San Raffaele’, dhe kjo marrëveshje hap një kapitull të ri. Nuk është e pamundur që në vitet në vijim, ata që kanë nevojë të udhëtojnë në Turqi dhe Itali për shërbime mjekësore, t’i gjejnë këtu, në Shqipëri, brenda sistemit shëndetësor publik. Po ashtu, do t’i japim mundësi të rinjve nga Ballkani për të studiuar në Universitetin e Mjekësisë në Tiranë dhe të dalin me një diplomë të nivelit të lartë europian”, përfundoi Rama.