Edhe pse për vite me radhë institucionet flasin për luftë kundër korrupsionit, Maqedonia e Veriut mbetet një nga vendet më të korruptuara në Evropë.

Sektori civil ka zgjedhur një mënyrë unike për të alarmuar për nivelin e lartë të korrupsionit në Maqedoninë e Veriut. Kjo pjesë e hequr nga kjo petull gjigante që është vendosur në sheshin e Shkupit, përbën 25 përqindëshin e buxhetit të shtetit i cili vlerësohet se ka shkuar në korrupsion.

Të dhënat e organizatës ndërkombëtare “Transparency International” tregojnë për përkeqësim: vendi në vitin 2024 u rendit në vendin e 88‑të nga 180 vende, me vetëm 40 pikë, çka tregon rënie nga viti paraprak. Komisioni Antikorrupsion vazhdon të denoncojë shkelje, por shumë pak raste arrijnë të çohen deri në gjykatë. Korrupsioni është i përhapur në prokurime publike, në sistemin shëndetësor, në ndarjen e subvencioneve dhe në punësimet në administratë.

Pavarësisht ekzistencës së një Strategjie kundër korrupsionit 2021–2025 në RMV, qëllimet dhe reformat thuajse nuk po zbatohen. Sipas raportit të fundit të Bashkimit Evropian, vetëm 13 për qind e aktiviteteve të planifikuara janë përmbushur gjatë vitit 2023.

Për më keq, vetë institucionet që duhet të luftojnë korrupsionin janë nën dyshime. Kryetarja aktuale e Komisionit Shtetëror për Parandalimin e Korrupsionit (KShPK) është nën hetim për korrupsion, ndërsa ish-prokurorja speciale Katica Janeva po vuan dënimin me burg për korrupsion në aferën “Reket”.