Kryeministri Edi Rama ka publikuar pamje nga aksioni për lirimin e hapësirave publike në qytetin e Durrësit, pjesë e nismës “Rilindja Urbane 2.0”.
Rama thekson se do të rivendoset një balancë e qartë mes të drejtës së qytetarëve për lëvizje të lirë dhe interesave ekonomike të bizneseve private, duke respektuar gjithmonë interesin e përbashkët të komunitetit.
“Edhe në Durrës vazhdon çlirimi i hapësirave publike, për t’i hapur rrugën Rilindjes Urbane 2.0 që do të rrisë cilësinë e jetës komunitare dhe përmasën e gjelbër të qyteteve tona të mëdha, ku do të rivendoset qartë kufiri mes lirisë publike për të lëvizur e marrë frymë lirisht dhe të drejtës për aktivitet ekonomik të subjekteve private, gjithnjë në respekt të komunitetit”, shkruan Rama.
Kujtojmë që mesditën e kësaj të premteje, fadromat dhe inspektorët e IMT Durrës u fokusuan në aksin “Aleksandër Goga”, pranë Muzeut të Dëshmorëve.
Aksioni i ndërmarrë nga Inspektoriati Vendor i Mbrojtjes së Territorit, Policia Bashkiake dhe strukturat lokale synon lirimin e hapësirave publike të zëna në mënyrë të kundraligjshme nga qytetarët dhe bizneset.
Gjatë ditëve në vijim, aksioni do të vijojë në këtë zonë deri pranë Spitalit Rajonal të Durrësit.
