Rreth 250 milionë bletë shpëtuan nga një kamion që u përmbys në Uashington të SHBA-së, duke detyruar autoritetet të lëshojnë paralajmërime për publikun që të shmangë zonën ku ndodhet turma e bletëve.

Kamioni, i cili transportonte mbi 31 tonë kosherë bletësh, u përmbys pranë kufirit me Kanadanë.

Në fotot e publikuara nga policia shihen një numër i madh bletësh që rrethojnë kamionin e përmbysur. Autoritetet thanë se zona e aksidentit do të mbetet e mbyllur “derisa të përfundojë operacioni i shpëtimit”.

“Qëllimi është të shpëtohen sa më shumë bletë të jetë e mundur”, deklaroi zyra e sherifit të qarkut menjëherë pas ngjarjes.

Plani është që bletëve t’u jepet kohë të rikthehen te kosheret dhe te mbretëresha e tyre, proces që mund të zgjasë 1 deri në 2 ditë.

Disa bletërritës fokusohen vetëm në prodhimin e mjaltit, ndërsa të tjerë japin me qira kosheret për fermerët që kanë nevojë për bletët për të pllenuar kulturat bujqësore të tyre.