Qeveria italiane ka miratuar prodhimin e verës joalkoolike pas disa vitesh rezistence ndaj këtij vendimi.

Ministritë e Financave dhe Bujqësisë në Romë nënshkruan një dekret që zyrtarisht përcakton kornizën tatimore për prodhimin vendas të verërave pa alkool.

Industria italiane e verës priti disa muaj për miratimin përfundimtar.

Që nga viti 2021, vera nga e cila është hequr alkooli është konsideruar gjithashtu verë në BE.

Italia i ka rezistuar prej kohësh miratimit të kësaj rregulloreje, pasi prodhuesit e verës kanë shprehur shqetësimin se kjo mund të ndikonte në kulturën italiane të verës.

Ministri i Bujqësisë, Francesco Lollobrigida i partisë, “Fratelli d’Italia” fillimisht ishte kundër saj.

Megjithatë, një vit më parë, pati një kthesë – pasi Italia iu përgjigj popullaritetit në rritje të të ashtuquajturave verëra “NoLo” – me përmbajtje pa alkool ose të ulët – dhe hapi rrugën për prodhimin e verës pa alkool.

Megjithatë, një kornizë e qartë ligjore për këtë ende mungonte. Dekreti që është nënshkruar tani ofron qartësi mbi akcizat, licensat dhe shpërndarjen.

Ai gjithashtu rregullon miratimin, ruajtjen, detyrimet administrative dhe rregulloret e transportit për verërat “NoLo”.

Kjo do t’u mundësojë verarive të finalizojnë projektet në vazhdim, të cilat, sipas Lollobrigida, hapin mundësi të reja.

Përfaqësuesit e industrisë së verës e mirëpritën shprehimisht këtë vendim.

“Kërkesa për verëra me përmbajtje më të ulët alkooli nuk mund të konsiderohet më një trend, por më tepër një ndryshim afatgjatë”, thanë ata.