Një nga dënimet më të ashpra të zbatuara ndonjëherë në Indonezi sipas ligjit të Sharias iu dha një çifti të pamartuar në provincën Aceh, i vetmi rajon në vend që zbaton ligjin islamik. Çifti u dënua të enjten me 140 goditje me kamzhik në një ekzekutim publik në një park, për kryerjen e marrëdhënieve seksuale jashtë martesës dhe pirjen e alkoolit.

Sipas zyrtarëve lokalë, dënimi përbëhej nga 100 goditje për marrëdhënie seksuale jashtë martesës dhe 40 për konsum alkooli. Gruaja nuk mundi ta duronte dhimbjen. Asaj i ra të fikët dhe u dërgua në spital me ambulancë, ndërsa partneri i saj qëndroi i përpiktë për të përballuar rrahjen.

Çifti ishte pjesë e një grupi prej gjashtë personash që u ndëshkuan për shkelje të ligjit islamik, përfshirë një oficer të policisë së Sheriatit dhe partneren e tij, të cilët u rrahën me 23 goditje secili.

Autoritetet e Aceh përdorin rrahjen me kamzhik si formë ndëshkimi për vepra penale që përfshijnë bixhozin, konsumimin e alkoolit dhe marrëdhëniet seksuale jashtë martesës. Sipas shefit të policisë së Sharias në Banda Aceh, Mohammad Rizal: “Siç premtuam, nuk bëjmë përjashtime, veçanërisht për anëtarët tanë. Kjo sigurisht që e njollos emrin tonë.”