Detaje të reja janë mësuar nga aksidenti i rëndë në Durrës, ku një 16-vjeçar ka përplasur për vdekje një 55-vjeçar.

Mësohet se adoleshenti e ka marrë makinën me qira nga një kushëri i tij. Duke qenë i mitur, adoleshenti e drejtonte mjetin pa patentë.

Aksidenti u shënua në zonën e Fllakës, teksa 16-vjeçari, i cili drejtonte një automjet tip Volkswagen ka përplasur për vdekje një këmbësor përgjatë aksit rrugor Fllakë–Bisht Kamëz.

Viktima është identifikuar si Qerim Bajrami, një peshkatar amator, i cili ndodhej pranë ligatinës së Fllakës për të gjuajtur peshk në momentin e ngjarjes.

I mituri nuk ka pësuar lëndime fizike nga aksidenti dhe aktualisht është shoqëruar nga policia. Grupi hetimor ndodhet në vendngjarje dhe po punon për zbardhjen e plotë të rrethanave. Burime nga policia bëjnë me dije se është kontrolluar edhe një kanal pranë rrugës për të përjashtuar mundësinë e pranisë së personave të tjerë të përfshirë apo të dëmtuar.