Ylli i futbollit Cristiano Ronaldo i ka propozuar martesë partneres së tij, Georgina Rodriguez, duke bërë kështu një hap të rëndësishëm në jetën e tyre personale.
Lajmin e veçantë ajo e bëri publike përmes rrjeteve sociale, ku publikoi një foto të një unaze të madhe me mbishkrimin:
“Po, po. Në këtë dhe në të gjitha jetët e mia”.
Postimi i saj, i cili është parë mbi 4 milionë herë, ka marrë pëlqime edhe nga personazhe të njohura si Kim Kardashian dhe grimerja e famshme Charlotte Tilbury.
Përveç lajmit për martesën, vëmendjen e tërhoqi unaza që Cristiano Ronaldo i dhuroi Georgina Rodríguez.
Sipas ekspertëve, vlera e saj mund të arrijë deri në 5 milionë dollarë. Tobias Kormind, drejtori i menaxhimit në ’77 Diamonds’ në Londër, shpjegon se unaza përmban një gur oval qendror prej afërsisht 35 karatësh.
Ai shton se ky gur është i rrethuar nga gurë të vegjël ovalë, secili me peshë rreth një karat, të vendosur në platin, duke e çuar totalin në rreth 37 karatë.
Madhësia dhe shkëlqimi i kësaj unaze e rendisin atë mes gurëve më të shquar, duke e krahasuar me diamantët e famshëm si Taylor-Burton, një gur 69.42 karatësh në formë dardhe, që iu dhurua Elizabeth Taylor nga Richard Burton dhe që thuhet se u bleu nga Cartier.
Kormind vlerëson se unaza e Georgina Rodríguez ka një çmim rreth 5 milionë dollarë.
Ronaldo, i cili është personi më i ndjekur në Instagram, ende nuk ka komentuar për fejesën.
Çifti janë në një lidhje prej nëntë vitesh dhe kanë dy fëmijë së bashku, Allana Martina (7) dhe Bella Esmeralda (3). Ronaldo ka pesë fëmijë në total. Ata u takuan në vitin 2016 në një dyqan Gucci në Madrid, ku punonte Rodríguez, dhe u shfaqën së bashku për herë të parë në një aktivitet të FIFA-s një vit më vonë.
Rodríguez është modele dhe influencuese dhe ka marrë pjesë në programe të shumta televizive, përfshirë dokumentarin e Netflix “I Am Georgina”.
Ronaldo, 40 vjeç, dhe Rodríguez, 31 vjeç, aktualisht jetojnë në Riad, ku ai luan për Al-Nassr.
Në qershor të vitit 2025, ai njoftoi se kontrata e tij do të vazhdonte deri në vitin 2027, mes spekulimeve se ai do të tërhiqej.
