Kreu i Partisë së Lirisë, Ilir Meta, ka dërguar një mesazh falënderimi për ndjekësit e tij në rrjetet sociale me rastin e përvjetorit të ditëlindjes.

Në postimin e tij, Meta shpreh se ndihet më i lirë, më i ri dhe më i fortë se kurrë, pavarësisht se Gjykata e Posaçme ka vendosur sërish mbajtjen e tij në burg. Ai falenderon të afërmit, miqtë dhe mbështetësit për urimet, duke përmendur veçanërisht nënën e tij, e cila i besoi emrin Ilir.

“Falenderoj përzemërsisht gjithë të afërmit, miqtë dhe dashamirësit për urimet e tyre me rastin e ditëlindjes time, e cila më gjen më të lirë, më të ri dhe më të fortë se asnjëherë tjetër. Një falenderim të jashtëzakonshëm për nënën time, e cila më besoi emrin ILIR“, shkruan Meta.

Më herët, GJKKO kishte rrëzuar kërkesën e Metës për ndryshimin e masës së sigurisë, edhe pse ai kishte ofruar një garanci prej 50 mijë eurosh.