Kryetari i Bashkisë Tiranë, Erion Veliaj, ka dërguar të enjten një mesazh urimi për festat e Krishtlindjes. Veliaj, i cili që nga shkurti i këtij viti ndodhet në paraburgimin e Durrësit si pasojë e akuzave të ngritura nga SPAK, ka shprehur urimet e tij lidhur me festën.
Në mesazhin e shpërndarë në rrjetet sociale, Veliaj thekson se:
“Shpresa lind edhe në momentet më të vështira.”
Statusi i Veliajt:
Kjo vigjilje festash na kujton se drita gjithmonë fiton mbi errësirën dhe se shpresa lind edhe në momentet më të vështira. Le të jetë Krishtlindja një ftesë për më shumë dashuri, më shumë mirëkuptim dhe më shumë besim te njëri-tjetri.
Uroj që çdo familje të ndjejë ngrohtësinë e bashkimit, që çdo zemër të mbushet me paqe dhe që Viti i Ri të na gjejë më të fortë, më solidarë dhe më të vendosur për të ndërtuar një të ardhme më të mirë për të gjithë.
Le ta mbajmë ndezur shpresën, sepse kur jemi bashkë, çdo sfidë mund të kthehet në mundësi. Gëzuar Krishtlindjen dhe një vit 2026 plot dritë e optimizëm!
