Prej pesë ditësh, fusha e mbetjeve urbane në Elbasan vijon të çlirojë tym dhe gazra toksike që kanë mbuluar qytetin dhe zonat përreth, duke e kthyer situatën në një emergjencë mjedisore.

Edhe pse flakët janë shuar në sipërfaqe, mbetjet e depozituara në landfill vazhdojnë të digjen në thellësi, duke lëshuar në ajër substanca të rrezikshme për shëndetin. Temperatura mbi 40°C e ka bërë edhe më të vështirë ndërhyrjen e zjarrfikësve dhe emergjencave civile, të cilët ndihmohen nga ushtria me mjete të posaçme.

Sipas ekspertëve mjedisorë, djegia e mbetjeve çliron substanca toksike, duke rrezikuar mijëra qytetarë që tashmë thithin ajrin e ndotur prej ditësh. Ndërkohë, situata paraqitet e rënduar edhe në bashkitë fqinje, të cilat nuk kanë mundur të depozitojnë mbetjet e tyre në landfillin e Elbasanit, duke i lënë ato rrugëve.

Dhjetëra banorë protestuan të premten para Prokurorisë së Elbasanit dhe më pas para godinës së Bashkisë, duke kërkuar mbajtjen e përgjegjësive për situatën e krijuar.

“Po helmohemi çdo ditë dhe institucionet heshtin. Kërkojmë ndërhyrje të menjëhershme dhe transparencë,” u shprehën protestuesit, të cilët paralajmëruan se nuk do të ndalen deri në marrjen e masave konkrete për shuarjen e plotë të zjarrit dhe mbrojtjen e shëndetit publik.

Edhe pse fusha e mbetjeve në Elbasan është përfshirë disa herë nga flakët ndër vite, kjo është hera e parë që zjarri zgjat për ditë të tëra. Depërtimi i tij në shtresat e mbetjeve ka krijuar vatra të fshehta që vijojnë të djegin nga brenda dhe të lëshojnë tym të dendur mbi qytetin.