Prokuroria pranë Gjykatës së Shkallës së Parë të Juridiksionit të Përgjithshëm Elbasan kërkoi dhe ekzekutoi masën “Arrest në burg” për tre persona, për veprat penale “Prodhim dhe shitja e narkotikëve” dhe “Futja ose mbajtja e sendeve të ndaluara në institucionin e ekzekutimit të vendimeve me burg”.

Në mesin e të arrestuarve është N.K., punonjës i policisë së burgjeve që shërbente në regjimin e brendshëm të IEVP Elbasan, i cili dyshohet se futte lëndë narkotike në burg kundrejt pagesës. Hetimet zbuluan se N.K. shfrytëzonte orët jashtë shërbimit, duke u prezantuar si shitës ambulant në qytet, dhe merrte porosi nga të afërmit e të paraburgosurve, që më pas i dorëzonte në institucion.

Në aktivitetin e kundraligjshëm ai dyshohet se bashkëpunonte me E.K., e cila e pagonte për futjen e drogës, dhe G.S., i cili shpërndante lëndën narkotike brenda burgut. Pagesat për shërbimet e N.K. varionin nga 100,000 deri në 200,000 lekë të vjetra.

Hetimet e kryera nga Prokuroria, duke përfshirë përgjime telefonike dhe ambientale, vëzhgime, dokumentim filmik, veprime simuluese dhe akte ekspertimi, konfirmuan implikimin e tre të dyshuarve.

Masat e sigurimit për tre personat nën hetim u ekzekutuan më 22 janar 2026 nga shërbimet e policisë gjyqësore të Drejtorisë së Përgjithshme të Burgjeve.