Një 25-vjeçar në Elbasan ka përfunduar në pranga pasi dyshohet se ka kryer marrëdhënie seksuale me një të mitur 16-vjeçare.
“Specialistët për Hetimin e Krimeve të Komisariatit të Policisë Elbasan vunë në pranga shtetasin M. Sh., 25 vjeç, pasi dyshohet se ka kryer marrëdhënie seksuale me një 16-vjeçare. Vijojnë hetimet për dokumentimin e plotë ligjor të rastit”,-thuhet në njoftimin e policisë.
Gjithashtu policia njofton se specialistët e Sektorit të Qarkullimit Rrugor:
-arrestuan në flagrancë shtetasit A. Gj., 44 vjeç dhe M. Ll., 62 vjeç, pasi u kapën duke drejtuar automjetet përkatëse, në gjendje të dehur;
-referuan materialet në Prokurori ku nisi procedimi penal për shtetasin A. Ç., 25 vjeç, pasi ditën e djeshme, në aksin rrugor “Bradashesh-Peqin”, automjeti që drejtonte është përplasur me automjetin me drejtues shtetasin Sh. Ç., 35 vjeç. Si pasojë e përplasjes janë dëmtuar lehtë shtetasi Sh. Ç. dhe pasagjerja në automjetin e tij.
Specialistët për Hetimin e Krimeve të Komisariatit të Policisë Librazhd referuan materialet në Prokurori ku nisi procedimi penal për shtetasin M. B., 31 vjeç, pasi dyshohet se ka ushtruar dhunë psikologjike ndaj bashkëjetueses së babait të tij, e cila u pajis me urdhër mbrojtjeje.
Ditën e djeshme, shtetasja H. K., 66 vjeçe, ka kallëzuar se kanë hapur llogari në rrjete sociale, me të dhënat e saj. Po punohet për përcaktimin e autorësisë së rastit.
