Kryeministri Edi Rama është shprehur se nuk do të japë dorëheqjen pas arrestimit të kryebashkiakut të Tiranës, Erion Veliaj, duke u shprehur se “duhet ta harroni”.

Gjatë bashkëbisedimit me qytetarët në rubrikën “Sy më sy”, Rama u shpreh se “për të më larguar mua nga politika ka dy rrugë, ose më largon zemra nëse nuk më rreh mjaftueshëm dhe aty them stop, ose më largon populli i Shqipërisë”.

“Dorëheqjen duhet ta harrosh ti bashkë me gjithë të tjerët, për të më larguar mua nga politika ka dy rrugë, ose më largon zemra nëse nuk më rreh mjaftueshëm dhe aty them stop, ose më largon populli i Shqipërisë.

Më 11 maj jam kurioz si do të votojnë ata që janë jashtë sepse thuhet që i dëbova unë. Te shohin çfarë mendimi kanë ata, nëse votojnë masivisht për mua si dëbuesi i tyre, kur shifrat tregojnë që largimi është konstant, atëherë do të mbaj shënim. Nuk jam i kapur pas pushtetit, por pas punës”, tha Rama.

“Jo vetëm oxhaku i vjetër i partisë së bufit të kënetës, por edhe mangallët e partiçkave, kanë vënë shishet poshtë, që kërkojnë dorëheqjen time. U përndezën nga era e mishit me gjak dhe kanë vënë shishet këtu poshtë dhe do vijnë të kërkojnë dorëheqjen time se u bë deti kos këtu”, vijoi kryeministri.