Ministri i Financave Bezalel Smotrich (Partia Fetare Sioniste) shprehu kundërshtimin e tij të martën ndaj planit të paqes të Presidentit të SHBA-së Donald Trump , duke e quajtur atë një “dështim të madh diplomatik” pasi Kryeministri Benjamin Netanyahu ra dakord për të në Uashington të hënën në mbrëmje.

Smotrich deklaroi se dakordësia për planin është “një akt verbërie me dashje që injoron çdo mësim të 7 tetorit”.

“Sipas vlerësimit tim, do të përfundojë me lot. Një tragjedi lidershipi që i ikën së vërtetës së hidhur”, shtoi ai.

Komentet e Smotrich vijnë pas heshtjes së tij fillestare për këtë çështje. Ai i kishte përcaktuar “vijat e kuqe” Netanyahut të hënën në mëngjes, duke sinjalizuar një lëvizje të mundshme për t’u larguar nga qeveria, varësisht nga rezultati i takimit.

“Realiteti do të na detyrojë të kthehemi në rrugën e heroizmit dhe fitores, duke marrë përgjegjësi për fatin dhe sigurinë tonë,” theksoi ai.

Megjithatë, Smotrich nuk hodhi plotësisht poshtë planin, duke përfunduar: “Ne do të konsultohemi, do ta shqyrtojmë dhe do të vendosim, me ndihmën e Zotit, por festimet që nga dje janë thjesht absurde.”