Të martën, Italia ka regjistruar numrin më të lartë të viktimave nga COVID-19 në gjashtë muaj.

Sipas shifrave të publikuara nga Ministria e Shëndetësisë, 353 persona humbën betejën me COVID-19 në 24 orët e fundit, numri më i lartë që nga data 6 maj.

Në total, Italia ka shënuar mbi 39.400 fatalitete prej virusit vdekjeprurës, ndërsa numri të infektuarve ka shkuar afërsisht 760 mijë.

Në Holandë, qeveria pohoi se vendimi për mbyllje të pjesshme që u implementua para tri javësh ka nisur “të korrë frytet” pasi është vërejtur një rënie me rreth 5 për qind e rasteve të reja nga java në javë.

Por nga ana tjetër, ka pasur një rritje të numri të viktimave (nga 329 në 435) çka e ka shtyrë qeverinë të njoftojë për masa shtesë për dy javët e ardhshme, duke përfshirë ndalimin e takimeve në publik të më shumë se dy personave nëse nuk janë nga e njëjta familje.

Mbi 7.450 persona kanë vdekur në Holandë prej coronavirusit ndërsa numri i rasteve të konfirmuara i ka tej kaluar 367 mijë.

Kryeministri i Hungarisë, Viktor Orban, njoftoi se në mesnatë do të rishpallet gjendja e jashtëzakonshme dhe se deputetët do e shtyjnë afatin deri në 90 ditë.

Po ashtu, në Hungari do të rikthehet ora policore nga mesnata deri në orën 5 të mëngjesit, do të bëhet e detyrueshme mbajtja e maskës.

“Pandemia po përhapet me shpejtësi”, tha Orban në Facebook. “Nga mesi i dhjetori, spitalet tona do të kenë arritur në limitet e kapaciteteve të tyre”.

Këto janë ndër tre shtetet e fundit që kanë ndërmarrë masa shtesë pas Austrisë, Greqisë dhe Suedisë.

“Po shkojmë në drejtim të gabuar. Situata është shumë serioze”, ka thënë së fundmi Kryeministri i Suedisë Stefan Lofven. “Çdo qytetar duhet të tregohet i përgjegjshëm. Ne e dimë mirë sesa e rrezikshme është kjo”.

Ndryshe nga shtetet e tjera europiane, Suedia vendosi të mos shpallte karantinën në pranverë. Masat e  reja të prezantuara nga qeveria hyjnë në fuqi të martën dhe kufizojnë kapacitetin e bareve dhe restoranteve deri në tetë persona për tavolinë.