Ish kryeministri Sali Berisha ka sfiduar kryeministrin Edi Rama në një debat publik.
“Unë kam kunat, Rama baxhanak, se njësoj janë. Kunati im s’ka marrë asnjë tender, i Ramës po. Të afërmit e mi s’kanë marrë asnjë tender, më gjeni një. E ftoj në një debat publik para jush dhe t’ja themi njëri tjetrit të gjitha”, tha Berisha.
Kryeministri Edi Rama kërkoi sot publikisht nga organet e reja të drejtësisë që të hetohet ngjarja e “21 Janarit” dhe e “Gërdecit” të ndodhura gjatë qeverisjes së demokratëve.
Ish-Kryeministri Sali Berisha i ka dhënë përgjigje kërkesës së Ramës për këto çështje. Në një konferencë shtypi nga selia e Partisë Demokratike, Berisha tha se është dakord që 21 Janari të hetohet dhe rihetohet disa herë, por ai theksoi se sipas tij përgjegjësi kryesor në atë ngjarje është Rama, i cili në atë kohë si kryetar opozite kishte thirrur në bulevard protestuesit për të përmbushur, sipas Berishës, axhendën e tij politike.
“Ajo që nuk është hetuar në 21 Janar, përgjegjësia direkte e Edi Ramës si organizator. E faktuar, jo se e them unë. Merrni faktin se u sulmua një Kryeministër në detyrë në zyrë. Ka një ngjarje, 6 Janari në Capitol Hill. Pra, ai që i solli mish për top njerëzit për të rrëzuar pushtetin e Sali Berishës dhe kjo që nuk është e imja, tashmë është e fiksuar në dokumente ndërkombëtare që kishte axhendë politike protesta. Jam plotësisht dakord të hetohet e rihetohet 100 herë. Dhe ju garantoj se përgjegjës kryesor është Edi Rama i cili solli ata mish për top për karrigen e tij, i cili i vendosi ata në funksion të një axhendë politike”.
“Sa i përket Gërdecit, një proces gjyqësor i drejtuar nga një prokurore politike anti-Berishë ka ndodhur, janë dënuar 22 vetë prej tyre. Ka dënime dhe 20, 18, zyrtarët më të lartë të ushtrisë. Edi Rama prej 9 vitesh ka ruajtur të njëjtin kualifikim, aksident teknologjik. Padija dhe injoranca nuk e lejon atë të kuptojë domethënien e plotë të krimit shtetëror.
Krimi shtetëror është dy lloje; i qëllimshëm kur shteti vret me qëllim, padashje kur ndodh siç ishte. Sigurinë e aktivitetit e kishte drejtoria e MEJKO, për çka ish-drejtuesi i saj u dënua 18 apo 20 vjet. Pse unë kam insistuar që ajo të shpallej vrasje shtetërore pa dashje? Sepse shpërblimi është tjetër. Por ai nuk ka nocion për shtetin”, deklaroi Sali Berisha.
