Ministrja e Shëndetësisë dhe Mbrojtjes Sociale, Albana Koçiu ka reaguar në lidhje me ngjarjen e sotme në Korçë, ku 45-vjeçari Bledar Trëndafili, leu me benzinë dhe më pas i vuri flakën, bashkëshortes së tij me të cilën ishin në proces divorci.

Në një postim në rrjetet sociale, ministrja Koçiu shkruan se po bëhet gjithçka që jeta e 31-vjeçares Melisa Trëndafili të shpëtohet.

Ajo shkruan se Melisa u sulmua nga një burrë burracak i cili në vend ta mbështeste, u kthye në agresor, ndërsa shton se mbështet institucionet në mënyrë që 41-vjeçarit t’i jepet dënimi maksimal.

“Mjeket e shërbimit të Djegie-Plastikës në QSUNT po bëjnë më të mirën e mundur për Melisën, vajzën, nënën e dy femijëve të vegjël nga Korça, e cila u sulmua sot në mënyrë brutale nga një “burrë” frikacak, që duhet të ishte krahë saj për ta mbështetur në rritjen e edukimin e fëmijëve, por që sot në mënyrë tinzare vendosi të kthehet në agresorin e saj, nënës së fëmijëve të tij.

E teksa inkurajoj institucionet përgjegjëse për ndalimin dhe dënimin maksimal të tij, i jam pranë me zemër familjes së Melisës. Askush nuk duhet të përjetojë një dhimbje të tillë.

Do të qëndrojmë kundër dhunës dhe mbështesim të gjithë ato gra që bëhen viktima të këtyre “burrave” që meritojnë ndeshkim maksimal. Kjo është një betejë që askush nuk e fiton dot vetëm, ndaj bashkë duhet të punojmë shumë e të bëjmë të pamundurën, të parandalojmë ngjarje si kjo e sotmja.”, shkruan ajo.