Në seancën plenare të së mërkurës, zv.kryeministrja e Shqipërisë, Belinda Balluku, njëkohësisht ministre e Infrastrukturës dhe Energjisë reagoi ashpër ndaj akuzave të deputetëve të opozitës, duke i quajtur ato sulme personale të motivuara politikisht.
Gjatë fjalës së saj në Kuvend, Balluku deklaroi se qëllimi i këtyre sulmeve është të mbulohen, sipas saj, dështimet dhe humbjet elektorale të Partisë Demokratike përgjatë viteve të fundit.
“Opozita nuk i fal sukseset. E kam të qartë pse jam objekt i këtij sulmi personal, pasi ju nuk i falni suksesin politik njeriut që punon, madje as atyre që dallojnë në radhët tuaja. Ju nuk i falni tetë humbjet në 12 vitet e fundit dhe përmes sulmeve personale ndaj meje përpiqeni të mbuloni dështimin tuaj,” u shpreh Balluku.
“Edhe pas baltës, aludimeve, gjysmë të vërtetave dhe gënjeshtrave të shumta që janë hedhur kohët e fundit, nuk do të dëgjoni kurrë nga unë akuza, sharje apo kërcënime ndaj drejtësisë së re, edhe kur prekem personalisht. Po ashtu, nuk do të më dëgjoni të bëj lavdërime apo himne, sepse besoj thellësisht se kjo drejtësi e re, e dalë nga reforma dhe produkt i vullnetit të PS dhe kryeministrit Rama, po kryen misionin për të cilin u ngrit – me pikat e saj të forta e të dobëta – por që, si çdo gjë e re, konsolidohet dita ditës. S’do të më dëgjoni asnjëherë të merrem me prokurorë apo gjyqtarë, sepse secili prej tyre kryen detyrën sipas vlerësimit profesional. Nuk do të prononcohem për çështje që janë në hetim, pasi ato kanë rrugën e tyre ligjore, të cilën do ta ndjek me diskrecion të plotë, derisa e vërteta të marrë formë të prerë, cilado qoftë ajo.Unë, ashtu si të gjithë kolegët e mi në PS, mbështes reformën në drejtësi dhe rezultatet e saj, edhe kur prekem personalisht. Sepse, ndryshe nga sa thuhet e mendohet, PS është një formacion politik serioz, i vetmi në Shqipëri ku fjala e secilit dëgjohet dhe ka peshë. Kjo reformë ka marrë mbështetjen e çdo socialisti dhe, në respekt të plotë të misionit të saj, unë nuk kam asnjë koment tjetër”, tha ajo.
