Ambasada e Shteteve të Bashkuara në Tiranë ka bërë thirrje për respektimin e kushteve të vizave dhe periudhës së qëndrimit në SHBA. Autoritetet amerikane nënvizojnë se tejkalimi i afateve të lejuara mund të sjellë pasoja serioze, përfshirë heqjen e vizës, deportimin dhe vështirësi për aplikime të ardhshme.

Në njoftim theksohet se qëndrimi përtej “datës së pranimit” në formularin I-94 mund të ndikojë në mënyrë të përhershme në mundësinë për të udhëtuar, punuar ose studiuar në SHBA. Ambasada u bën thirrje qytetarëve të planifikojnë me kujdes vizitat dhe të respektojnë rregullat e udhëtimit.

Paralajmërimi vjen në një periudhë kur shumë shqiptarë udhëtojnë në Shtetet e Bashkuara për arsye studimi, pune apo vizite familjare, duke e bërë respektimin e afateve një prioritet për të shmangur probleme të mundshme ligjore.

“Respektoni kushtet e vizës suaj amerikane dhe periudhën e lejuar të qëndrimit në Shtetet e Bashkuara. Qëndrimi përtej datës së caktuar në formularin I-94 mund të sjellë pasoja të rënda, duke përfshirë heqjen e vizës, deportimin e mundshëm dhe pamundësinë për të marrë viza në të ardhmen. Qëndrimi i tejzgjatur mund të ndikojë në mënyrë të përhershme në mundësinë për të udhëtuar, studiuar ose punuar në SHBA”, njofton ambasada.