Ish-kryebashkiaku i Shkodrës, Bardh Spahia, ka reaguar pas përfundimit të seancës paraprake në Gjykatën e Posaçme Kundër Korrupsionit dhe Krimit të Organizuar, ku ai është marrë i pandehur nga SPAK me akuzën e “Pengimit për ekzekutimin e vendimeve të gjykatës”.

Në një deklaratë për mediat, Spahia e cilësoi çështjen ndaj tij si të motivuar politikisht, duke pretenduar se padia është përgatitur nga Partia Socialiste dhe bazohet në dëshminë e një personi të dënuar më herët për vjedhje dhe korrupsion.

“Nuk pranova gjykimin e shkurtuar, por kërkova një proces normal, sepse kjo është një padi e inskenuar nga zyrat e PS-së, e përdorur politikisht në kohë elektorale. Akuza është qesharake dhe e pabazë. Në gjithë veprimtarinë time kam pasur si udhërrëfyes vetëm zbatimin e ligjit dhe mbrojtjen e interesave të qytetarëve të mi,” deklaroi Spahia.

Sipas tij, çështja lidhet me shkarkimin e një ish-drejtori gjatë mandatit të tij si kryetar i bashkisë dhe kryetar i Asamblesë së Shoqërisë Aksionare “Ujësjellësi Shkodër”. Ai theksoi se vendimi për këtë shkarkim ka qenë brenda kuadrit ligjor.

“Kjo nuk do të më ndalojë apo të ngadalësojë rrugën tonë drejt fitores më 11 maj,” – u shpreh ai.