Një 31-vjeçar shqiptar ka humbur jetën në një aksident automobilistik në Patra, teksa për koincidencë, motocikleta e tij është përplasur me një automjet me targa shqiptare.

Erges Çobaj, 31 vjeç, nga Vlora, ka qenë duke drejtuar motoçikletën në pronësi të një greku, teksa duke qarkulluar në rrugën “Othonos Amalias” është përplasur me automjetin me targa shqiptare AA797ZY që drejtohej nga Natasha Saliaj, 48 vjeçe nga Fieri por me banim në Korinth.

Automjeti i Saliajt po lëvizte në të njëjtën rrugë dhe në të njëjtin drejtim me motoçikletën dhe janë përplasur anash. Automjeti më pas ka devijuar djathtas duke goditur hekurat mbrojtëse të rrugës.

Si pasojë e aksidentit ka humbur jetën 31-vjeçari Çobaj.

48 vjeçarja nga Fieri u arrestua fillimisht por u la më pas e lirë me urdhër të Prokurorit.

Gjatë kontrollit trupor të 31-vjeçarit Çobaj, janë gjetur dhe sekuestruar 50.9 gram kokainë dhe rreth 2500 euro.

Sipas mediave greke, Çobaj, i njohur në Patra edhe si “Stelios” ishte personi që kishte dërguar në spital një të plagosur me armë në Agios Nikolaos, më 6 maj 2022.