Adoleshentët në Australi u thanë lamtumirë rrjeteve sociale përgjithmonë. Ndalimi i parë në botë i mediave sociale për fëmijët nën 16 vjeç ka hyrë tashmë në fuqi. “Përshëndetje studentë, unë jam kryeministri dhe dua të flas drejtpërdrejt me ju për diçka shumë të rëndësishme”, tha Anthony Albanese duke sqaruar se vendimi është i pari në të gjithë botën dhe një model për tu ndjekur nga vendet e tjera. Kryeministri Australian shtoi se ndaloi rrjetet sociale për atë grupmoshë në mënyrë që fëmijët të mos rriten me algoritme dhe presion, por të qetë dhe nën kontrollin e prindërve të tyre.
“Është një nga ndryshimet më të mëdha shoqërore dhe kulturore me të cilat është përballur kombi ynë. Është një reformë e thellë, e cila do të vazhdojë të jehojë në të gjithë botën në muajt në vijim, për të ndihmuar jo vetëm këtë brez, por edhe brezat që do të vijnë. Bëhet fjalë për familjet tona që marrin përsëri kontrollin. Teknologjia mund të ketë një ndikim të mahnitshëm në lehtësimin e jetës sonë, por është e rëndësishme, ndërsa teknologjia zhvillohet, që njerëzit të mbajnë kontrollin, që ne të shprehim autoritetin tonë si shoqëri dhe të mbështesim familjet dhe të themi se mjaft është mjaft”, tha ai.
Fëmijët shprehin mendime të perziera lidhur me ndalimin e rrjeteve sociale. “Ne meritojmë kohë me njerëz të vërtetë për të mësuar gjuhën e trupit, tonin, empatinë dhe të gjitha sinjalet sociale që nuk mund t’i marrësh nga një ekran. Ne gjithashtu meritojmë edhe mërzinë sepse mërzia është ajo që e bën trurin tonë të nxisë kreativitetin dhe të mendojë për ide të mëdha”, tha Florence Brodribb, përdoruese e rrjeteve sociale.
“Është paksa e pakuptimtë, ne thjesht do të krijojmë mënyra të reja për të hyrë në këto platforma, kështu që çfarë kuptimi ka kjo? Mendoj se është paksa e padrejtë sepse na dhanë një afat shumë të shkurtër për t’u përgatitur dhe mendoj se duhet të jetë ndoshta 14 ose 15 vjeç për të pasur një përjashtim sepse ata mund të fillojnë të gjejnë një punë dhe mendoj se është paksa e padrejtë që ata nuk mund të përdorin rrjetet e tyre sociale”, tha Claire Ni, studente.
Sipas zyrës së statistikave të vendit, në Australi ka pesë milionë fëmijë nën moshën 16 vjeç dhe një milion midis moshës 10 dhe 15 vjeç.
