Një denoncim i bërë në emisionin “Stop”, hedh dyshime për praktikën e noterit të qytetit të Bilishtit, Jorgo Gjamo. Sipas qytetarëve, noteri nuk ndodhet në qytet prej dy vitesh, pasi bashkëshortja e tij është transferuar si gjyqtare në Apelin Administrativ në Tiranë. Çuditërisht, aktet dhe dokumentet zyrtare, që duhej të firmoseshin nga noteri, bëheshin nga ndihmësi i tij, pa nevojën e prezencës fizike të noterit.Për të verifikuar këto pretendime, agjentët e “Stop” shkuan në Bilisht me kamera të fshehtë. Ata realizuan një prokurë të posaçme, dhe rezultati konfirmoi denoncimin. Aktet po përgatiteshin dhe firmoseshin nga ndihmesi, pa praninë e noterit.Ndihmësi i Jorgo Gjamos përdorte fletë A4 bosh, të firmosura më parë në cep nga vetë noteri, duke lejuar, që aktet të realizoheshin lehtësisht, edhe kur noteri nuk ishte prezent. Gazetari i “Stop” kontaktoi më pas vetë Jorgo Gjamon, duke inskenuar një denoncim për të marrë deklaratën e tij. Noteri pranoi, se në ditën, kur u realizua prokura e posaçme, ndodhej në Tiranë dhe do të kthehej vetëm në fundjavë. Më pas gjatë takimit, noteri u përpoq të justifikohej, duke thënë, se nuk e dinte, sesi kishte ndodhur.

Mbrëmë drejtuesi i lëvizjes “Shqipëria bëhet”, Adriatik Lapaj, ka vendosur të bëjë një akt të pazakontë. Ai ka marrë një karrike dhe ka protestuar i vetëm para kryeministrisë, duke thënë, se nuk do të lëvizë që aty, derisa të ikë kryeministri Rama.

Një qytetare nga Tirana tregon, se ndjehet e mashtruar nga një person, që e konsideronte mike. Ajo thotë, se Elona Tati, pas një viti miqësie i kërkoi një shumë prej 5 milionë lekësh, duke thënë, se i duheshin për një emergjencë. Duke qenë se denoncuesja nuk i kishte paratë, mori kredi në bankë me afat shlyerjeje tre vjet, vetëm që ta ndihmonte mikeshën e saj.Mirëpo tre muajt, e afatit të premtuar, kaluan dhe Elona nuk pagoi. Duke parë, se premtimet nuk po mbaheshin, qytetarja kërkoi, që gjithcka të përpilohej në zyrën noteriale të Redion Zaloshnjës, ku Elona deklaroi, se deri në shtator 2024, do ta shlyente shumën. Por as ky afat nuk u respektua.Denoncuesja bëri edhe një deklaratë të dytë noteriale te i njëjti noter, duke i dhënë Elonës një afat më të gjatë, pra shlyerje deri në qershor 2025. Por as në këtë afat nuk i mori paratë e veta.Gazetarja takoi Elona Tatin, e cila sërish deklaroi, se do t’i kthente paratë, duke kërkuar edhe dy muaj kohë. Në prani të grupit të xhirimit, Elona u zotua, se më 7 janar do të shlyente 1 milion lekë, ndërsa pjesën tjetër do ta paguante gjatë muajit shkurt.