Kryeministri australian, Anthony Albanese është martuar me partneren e tij Jodie Haydon, duke u bërë udhëheqësi i parë i vendit që martohet gjatë kohës që është në detyrë, sipas BBC.
Çifti u martua dje pasdite në kryeqytet, Kanberra, një ditë pas seancës së fundit paralamentare të vitit.
“Jemi absolutisht të kënaqur që ndajmë dashurinë dhe angazhimin tonë për të kaluar jetën së bashku, para familjes dhe miqve tanë më të ngushtë”, tha Albanese në një deklaratë të shkurtër.
Çifti u fejua në Ditën e Shën Valentinit të vitit të kaluar. Pritja e dasmës u zhvillua në rezidencën e tij zyrtare, “The Lodge”.
Deri në ditën e madhe, planet e dasmës ishin mbajtur sekret për shkak të shqetësimeve në lidhje me sigurinë.
Të pranishëm ishin prindërit e Haydon, si dhe djali i Albanese nga martesa e tij e mëparshme.
Qeni i Albanese, Toto, shërbeu si mbajtës i unazave ndërsa çifti eci drejt altarit me këngën “Signed, Sealed, Delivered (I’m Yours)” të Stevie Wonder.
Kryeministri ndau gjithashtu një video në rrjete sociale ku tregohej çifti i lumtur duke ecur drejt altarit, ndërsa të ftuarit i mbuluan me konfeti.
Disa nga ministrat e kabinetit të Albanese morën pjesë në ceremoni, gjithashtu.
Vallëzimi i tyre i parë u bë nën tingujt e “The Way You Look Tonight” nga Frank Sinatra.
Festimet përfshinin edhe kanaçe birre të punuara me porosi me imazhin e çiftit.
Albanese, 62 vjeç, dhe Haydon, 47 vjeç, u takuan për herë të parë në një darkë biznesi në Melbourne në vitin 2020, ndërsa kryeministri ishte udhëheqës i opozitës.
Haydon u shfaq gjatë fushatave zgjedhore të Albanese në vitet 2022 dhe 2025, dhe u pa përkrah kryeministrit në ngjarje të mëdha, përfshirë funeralin e Mbretëreshës Elizabeth II dhe në një darkë shtetërore të organizuar nga ish-presidenti i SHBA-së, Joe Biden.
Albanese është kryeministri i parë australian që martohet ndërsa është në detyrë.
