Kryeministri Edi Rama, foli nga Pallati i Kongreseve këtë të martë, në Forumin e Investimeve WB6-Bashkimi Evropian, për aktivitetin Hackathon-i Rajonal i Inteligjencës Artificiale 2025.
Sipas Kreut të qeverisë, ky forum ka bërë bashkë 161 pjesëmarrës nga i gjithë Ballkani Perëndimor dhe diaspora, me synimin për të zhvilluar zgjidhje konkrete të bazuara në inteligjencën artificiale, AI, për sfida reale shoqërore.
Në fjalën e tij, Kryeministri ka deklaruar se qeveria është e hapur për të bashkëpunuar me inovatorët, ndërsa zbuloi planin për krijimin e një akseleratori të fuqishëm në mbështetje të ministres AI të kabinetit Rama, Diella.
“Kemi rënë dakord të çojmë përpara procesin duke hapur dyert e qeverisë për të gjithë inovatorët dhe duke krijuar një hapësirë të përbashkët me bërthamë agjencinë e ekselencës që e kemi krijuar para pak kohe. Kjo do të thotë që start up-et dhe inovatorët të kenë mundësi të aksesojnë institucionet e të shohin nga afër problematikat dhe të shfrytëzojnë statistikat dhe atë brum që më pas është baza e zgjidhje përmes AI.
Besoj që duke bërë këtë do të ndodhë ajo që ndodh gjithmonë në këtë fushë, do të mësomë shumë gjëra të reja nga njëri -tjetri dhe do të prodhojmë produkte të reja. Kemi sfidën të krijojmë një akselerator shumë të fuqishëm në mbështetje të Diellës, ministres AI, akselerator që do të bazohet tek ju, kapitali njerëzor që kemi brenda AKSHI dhe do të mundohemi që çdo institucioni t’i zgjerojmë trurin nëpërmjet AI, ky është plani. Më than që keni paraqitur 161 ide, gara do të vijojë”, tha Rama.
