Në Tiranë po zhvillohet finalja e garës ndërkombëtare për “Parkun e Besimit” (Faith Park), një projekt që synon krijimin e një hapësire të re kushtuar harmonisë fetare, bashkëjetesës dhe trashëgimisë shpirtërore.

12 ekipe finaliste nga disa prej zyrave më prestigjioze të arkitekturës në botë, që përfaqësojnë vende si Mbretëria e Bashkuar, Portugalia, Danimarka, Gjermania, Spanja, Meksika, Belgjika, Holanda dhe Italia, paraqitën konceptet e tyre përpara një jurie ndërkombëtare, me qëllim përzgjedhjen e projektit fitues.

I pranishëm në këtë fazë të konkursit është edhe Kryeministri Edi Rama. Nisma është ndërmarrë nga Korporata e Investimeve Shqiptare (AIC), në bashkëpunim me Agjencinë Kombëtare të Planifikimit të Territorit (AKPT).

Parku do të ndërtohet brenda Kalasë së Petrelës dhe synon të shndërrohet në një qendër të re kulturore dhe shpirtërore për Tiranën.

Ai do të ofrojë hapësira për pushim dhe ndërveprim për njerëz nga grupe, kombësi dhe besime të ndryshme, duke shërbyer si vend për ngjarje që festojnë këto komunitete.

“Parku i Besimit” frymëzohet nga vlerat e Shkrimeve të Shenjta dhe nga tradita shqiptare e harmonisë ndërfetare.

Gjatë fjalës së tij, Kryeministri Rama u shpreh se kjo nismë nuk është thjesht një ndërhyrje fizike, por një transformim i thellë dhe domethënës.

“Kam kohë që pres që kjo nismë të nisë. Është për njerëz krijues, të talentuar dhe për këdo që na viziton e dëshiron të ndajë këtë hapësirë. Nuk është thjesht ndryshimi i një zone, por një transformim kuptimplotë. Duam të mbledhim pemë, shpresë dhe vazhdimësi. Parku i Besimit nuk është simbol i fesë. Është një faltore adhurimi që nuk bën pyetje se në çfarë besoni, por ju fton të mrekulloheni tek qëndresa e pemëve të fikut, tek pemët e ullirit,” – tha Rama.