Prokuroria e Beratit ka njoftuar këtë të martë përmes një deklarate të shpërndarë për mediat akuzën ndaj ish-kreut të SHISH Aleksander Shulla të Beratit dhe djalit të tij Pandeli Shulla për tre akuza të veprës penale. Sipas njoftimit thuhet se akuzohen për “nxjerrje sekreti shetëror”, “mbajtja e armëve pa leje” dhe “Organizimin e lojërave të fatit”.
“Ish-drejtori i Shërbimit Informativ të Shtetit në Berat, shtetasi A.Sh dhe djali i tij, P.Sh. janë marrë në hetim nga Prokuroria pranë Gjykatës së Shkallës së Parë të Juridiksionit të Përgjithshëm Berat për veprat penale ‘Organizimi ose ushtrimi i veprimtarive të lojrave të fatit në kundërshtim me ligjin’, ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Tregimi i sekretit shtetëror nga personi që i është besuar’ parashikuar nga nenet 197/1, 273/3 dhe 294/1 të Kodit Penal.”-thuhet në njoftim.
Në njoftim thuhet më tej se sipas informacioneve të grumbulluara hetimi ka nisur duke proceduar ambientet në lagjen “30 vjetori” në një lokal që dispononte djali i tij, ku zhvilloheshin lojëra fati që zhvilloheshin online.
“Sipas Prokurorisë pranë Gjykatës së Shkallës së Parë të Juridiksionit të Përgjithshëm, Berat, nga hetimet mbi procedimin penal nr.370 të vitit 2023, pas informacioneve se në një ambient në lagjen ’30 Vjetori’ në një lokal që drejtohej nga shtetasi P.Sh., po zhvilloheshin lojëra fati, u konstatuan kompjuterat e markave të ndryshme, të ndezura dhe në ekrane shfaqen lojrat online të ngjashme me ato të Adex Casino.”-thuhet më tej në njoftim.
Më tej Prokuroria njofton se gjatë kontrollit të banesës së ish-kreut të SHISH Berat janë gjetur armë dhe municione pa leje.
“Gjatë hetimeve, u ushtrua kontroll i banesës së shtetasit A.Sh., babait të tij, ku u konstatuan një krëhër metalik ngjyrë bronxi me 5 fishekë, të paplasur të kalibrit 7.62 mm, një çantë dore ngjyrë të zezë brenda të cilës u gjetën 3 krehër, të mbushur secili me nga 7 fishekë të kalibrit 7.62 mm dhe dy USB me mbishkrimet “Turbox” dhe “Kingston”. Ky shtetas i cili ka ushtruar detyrën si Drejtor i Shërbimit Informativ Berat, shpjegoi se, në nëntor të vitit 2023 është larguar nga detyra dhe ka dorëzuar armatimin por ka harruar të dorëzojë municionin e gjetur në banesë nga shërbimet e policisë. Ai sqaroi se, fishekët e kalibrit 7.62 janë fishek të armëve të vjetra që i ka gjetur të godina e vjetër e ShIK-ut dhe i ka marrë si suvenir dhe i ka harruar në banesë.” –thuhet në njoftim
Ajo që veçohet në njoftimin e Prokurorisë është që ish-kreu i SHISH ka disponuar një USB me materiale sekrete që lidhen me detyrën që ai ka ushtruar më parë e cila është konfiskuar menjëherë nga Prokuroria.
“Por nga verifikimet e kryera nga prokuroria rezultoi se armatimet ishin kthyer dhe kjo provohej edhe nga fletëhyrja që ndodhet në institucion. Ndërkohë që nga verifikimet e kryera rezultoi se, dy nga materialet e ndodhura në Usb-në me emërtimin “Usb drive” janë të klasifikuara në nivelin “sekret” dhe administrohen në SHISH në kopje të vetme. Kopjimi ose shumëfishimi i tyre është i ndaluar dhe në kundërshtim me aktet që normojnë punën e SHISH.”-përfundon njoftimi.
