Kryetari i Partisë Demokratike, Sali Berisha, zhvilloi një konferencë për mediat ku theksoi nevojën për një rishikim të sistemit të drejtësisë në Shqipëri.

Ai bëri thirrje institucioneve europiane, duke përfshirë Parlamentin dhe Komisionin Europian, të mos mbështesin sistemin aktual të drejtësisë, që sipas tij, është krijuar nga qeveria Rama.

Berisha kërkoi ndërhyrjen e Komisionit të Venecias për të rishqyrtuar sistemin e drejtësisë në tërësi, duke theksuar se Shqipëria ka pësuar rënie në renditjen ndërkombëtare pas reformave, duke kaluar nga vendi i 62 në vendin e 106, duke lënë pas vende si Vietnami, Bangladeshi dhe Tunizia.

Ai kritikoi ashpër ndërhyrjen e qeverisë në drejtësinë penale, duke e përshkruar atë si një “degë ekzekutivi për narkoshtetin shqiptar”.

“Por jo më pak dramatike është ndërhyrja e qeverisë në drejtësinë penale. Në këtë kuadër, Shqipëria para reformës renditej në vendn e 62, kurse pas reformës sorosiane renditet në vendin e 106, duke pasur kështu shumë vende para, Vietnami, Banladeshin, Tunizinë, Kenian, Nigerinë, etj. Kurse Kosova renditet në këtë kontekst në vendin e 46.

Pra, këto tregues dëshmojnë se drejtësia e re është një drejtësi e munguar për qytetarët shqiptarë.

Është një degë ekzekutivi për narkoshtetin shqiptar.

Ndaj PD i bën thirrje Parlamentit Europian, Komisionit Europian, vendeve partnere të heqin dorë nga çdo mbështetje e kësaj drejtësie të kriminalizuar, të kontrolluar në çdo qelizë të saj nga kreu i narkoshtetit Edi Rama dhe regjimi i tij.

Të angazhojnë Komisionin e Venecias për një rishqyrtim tërësor të këtij sistemi, në mënyrë që shqiptarëve t’u rikthehet e drejta themelore e një procesi ligjor të drejtë dhe drejtësia të nxirret nga kthetrat e politikës dhe të shndërrohet në një sistem të varur nga ligji”, u shpreh Berisha.