Shiste 8 mijë lekë një dozë kokainë, i humbiste gjurmët duke lëvizur me autobus dhe në këmbë, ja çfarë i ndodhi 31-vjeçarit

Policia e Tiranës ka finalizuar operacionin e koduar “Stacioni”, për goditjen e veprimtarisë kriminale në fushën e narkotikëve.

Gjatë aksionit, policia ka arrestuar një 31-vjeçar, i cili vinte nga Durrësi për në Tiranë, për të shpërndarë kokainë. Gjithashtu, efektivët kanë sekuestruar një pako me kokainë me peshë 414 gramë dhe një aparat celular.

Bëhet me dije se është arrestuar shtetasi F.B, ndërsa po hetohen lidhjet e tij për të zbuluar ku e blinte kokainën në Durrës dhe si funksiononte rrjeti.

31-vjeçari nuk ka bashkëpunuar me policinë për të treguar treguar bashkëpunëtorët.

Njoftimi i policisë:

Specialistët e Sektorit për Hetimin e Narkotikëve dhe Trafiqeve të Paligjshme në DVP Tiranë, në vijim të punës për goditjen e aktivitetit kriminal në fushën e prodhimit dhe shpërndarjes së lëndëve narkotike, pas një pune të mirëfilltë hetimore, bazuar dhe në të dhënat e grumbulluara në rrugë operative, se një shtetas posedonte dhe shpërndante lëndë narkotike kokainë në zona të ndryshme të qytetit të Tiranës, organizuan dhe finalizuan operacionin policor të koduar “Stacioni”, në kuadër të të cilit u bë kapja dhe arrestimi në flagrancë i shtetasit:

– F. B., 31 vjeç, banues në Durrës, i dënuar më parë për veprën penale “Prodhimi dhe shitja e narkotikëve”.

Ky shtetas, pasi siguronte lëndën narkotike në sasi 500 gramë deri në 2 kg, në qytetin e Durrësit, e ndante në porcione të vogla, të cilat më pas i shiste në zonën e “Don Boskos”, në rrugën “Mine Peza” dhe në afërsi të Zogut të Zi, kundrejt vlerës 8000 lekë të rinj një dozë me kokainë. 31-vjeçari, lëvizjet nga Durrësi në Tiranë, i bënte me transport publik, ndërsa brenda Tiranës lëvizte me këmbë, që të ushtronte aktivitetin e tij pa u pikasur nga shërbimet e Policisë.

Ndërkohë, vijon puna për identifikimin dhe kapjen e personave të tjerë të përfshirë në këtë aktivitet kriminal.

Materialet i kaluan Prokurorisë së Rrethit Gjyqësor Tiranë, për veprime të mëtejshme, për veprën penale “Prodhimi dhe shitja e narkotikëve”.

Të Fundit