Akademia e Çiklizmit pranë pedonales së Parkut të Liqenit, do të jetë pika më e re rekreative në Tiranë.

Kryeministri Edi Rama ka publikuar sot foto nga Akademia e Çiklizmit për fëmijët e cila është konceptuar si një park shumëfunksional, me pistë biçikletash dhe module lodrash të mëdha, si Kulla e Sahatit dhe Ura e Tabakëve, ndërsa një tjetër hapësirë që shton vlerën e parkut është edhe labirinthi i krijuar me bimësi.

MIRËMËNGJES, dhe me Akademinë e Çiklizmit për fëmijë në Parkun e Liqenit të Tiranës, ju uroj një fundjavë të mbarë.

Akademia e Çiklizmit në Parkun e Madh të Liqenit, një nga projektet më të rëndësishëm për vitin 2022, është konceptuar jo vetëm në shërbim të përmirësimit dhe rritjes së mundësive rekreative në park, në përputhje me nevojat e komunitetit për më shumë mundësi për aktivitete sportive, edukative, shoqërore, argëtuese, aktive dhe të shëndetshme, por edhe për të evokuar Tiranën dhe emblemat e kryeqytetit.