“Keni marrë miliarda euro borxh në emër të shqiptarëve”, Basha: Taksat për lakminë tuaj, jo për mirëqenien e qytetarëve – Stop
Lajme, Të Gjitha

“Keni marrë miliarda euro borxh në emër të shqiptarëve”, Basha: Taksat për lakminë tuaj, jo për mirëqenien e qytetarëve

Kryedemokrti Lulzim Basha, teksa komentonte projekt-buxhetin e vitit 2022 në Kuvend, u ndal te ndihma ekonomike dhe ekonomia shqiptare në përgjithësi. Ai gjithashtu u ndal dhe te oligarkët, duke aluduar se shumica e tenderave qeveritare përqendrohet në duart e 5 personave.

Kryedemokrati citoi dhe emigrimin, duke shtuar se shumica e shqiptarëve është larguar për shkak të kushteve të vështira dhe mungesës së punësimit në vendin tonë. Për bujqësinë kryedemokrati tha se ndodhet në vështirësi dhe është lënë në harresë për 8 vite.

“Mentaliteti juaj, duket edhe njëherë në këtë buxhet, që përveç taksave dhe akcizave që rriten dhe shtohen, shfaq dukshëm tahmanë për të mbrojtur status quo-në dhe interesat e një pakice, që pengon zhvillimin, që dëmton prodhimin vendas, që ka nxitur dhe do vazhdojë të nxisë një rritje të mëtejshme çmimesh nga e cila penalizohen të gjitha familjet shqiptare. Mirëpo Shqipëria ndodhet përballë sfidave të mëdha dhe ka nevojë për zgjidhje po aq të mëdha. Që ju nuk i jepni dot. Sepse ndërkohë që ju majmeni e krenoheni majë plehut, vendi po plaket me shpejtësi marramendëse. Rritja e numrit të të moshuarve po shoqërohet me emigrimin e familjeve të reja dhe me normat më të ulëta të lindshmërisë në vend. E ndonëse qeverisni këtë vend prej 8 vitesh, gjysmën e të cilave të vetëm, pyetjet për çështjet kryesore që shqetësojnë shqiptarët I keni lënë pa përgjigje.

Sepse ndonëse keni marrë më shumë borxh se të gjitha qeveritë e mëparshme të bëra bashkë, keni rritur taksat dhe tarifat më lart se kurrë më parë në historinë e këtij vendi që nga Tanzimati, nuk keni ditur t’i ktheni miliardat që keni keqmenaxhuar as në mirëqenie për qytetarët, as në paga dhe pensione më të larta dhe të dinjitetshme, as në përmirësimin e produktivitetit të sipërmarrjeve. Përkundrazi. Miliardat që keni marrë borxh në emër të shqiptarëve, taksat që keni rritur për të financuar makutërinë tuaj, kanë shërbyer për ndërtimin e një ekonomie të përqendruar në pak duar.

Me shtetin e përdorur si punëdhënës patronazhistësh dhe i pak oligarkëve, me të cilët keni vrarë konkurrencën e lirë, keni ndrydhur zhvillimin ekonomik, keni penguar investimet e huaja. E keni bërë Shqipërinë një vend nga i cili largohen të rinjtë e të rejat, largohen profesionistët dhe forca prodhuese e shoqërisë”, tha Basha.

Previous ArticleNext Article

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *